Os profesores do departamento de Electricidade, Geni Lorenzo e Ton Touza, xunto co profesor do departamento de Metal, Miguel Rodríguez, están a realizar estes días unha visita a diferentes empresas e centros de formación en Portugal no marco do programa Erasmus+.
O obxectivo desta mobilidade é coñecer de primeira man distintas experiencias formativas e establecer contactos que permitan abrir novas vías de colaboración internacional para o alumnado de Formación Profesional do IES Plurilingüe A Paralaia.
Durante a estancia, o profesorado está a manter reunións con responsables de empresas e institucións educativas portuguesas, explorando posibles acordos para futuras mobilidades, prácticas formativas e proxectos de cooperación vinculados ás especialidades de Electricidade e Metal.
Este tipo de iniciativas reforzan a aposta do centro pola internacionalización e pola creación de oportunidades que contribúan á formación integral do alumnado, facilitando experiencias profesionais e persoais nun contexto europeo.
Desde o IES Plurilingüe A Paralaia seguimos traballando para ampliar horizontes e ofrecer ao noso alumnado novas oportunidades de aprendizaxe e crecemento a través do programa Erasmus+.
Comentarios
Publicar un comentario